Billet d'humeur

حومتنا الكبيرة (الجزء الرابع) : مبارات عجاج

الجزء الثالث

نهارت الغالا متاع عجاج قمت الصباح بكري هزّيتو عملتلو فوتينغ في البطحاء متاع الحومة، و درّبتو مليح مع كبش منير ولد التركي

منير: يزّي مورو بركا!! الكبش ما عادش فيه!!! يا نمّي باش تقتلهولي ؟؟؟
مورو: شنوّا منير خايف؟ ماك تعرف اليوم يلزمو عجاج يقلعها البارتي و ما فمّاش كبش في الحومة أقوى من كبشك
منير: لا عاد سامحني فيها هاذي…برّا هزّو لكبش ولد لوصيف الّي غلبو المرة الّي فاتت و أحكي معاه اللغة هاذي
مورو: ولد لوصيف بوه ما خلّاهوش، من الجمعة الّي فاتت كلمتو، قال لي باهي طو يشوف مع بوه، لكن البارح رجعتلو و طلعلي بحكاية من الحيط، قال لي: كبشو ساقيه توجع فيه….منير و الله هاذي اخر كتّة و نروحو
منير: باهي، لكن ما تخلّيش كبشك يوخّر برشا
غمزتو له: أوكي
مورو: هيّا عجاج وخّر، وخّر عجاج
منير: أوه يا زبّـــــــــــــي مشيت أنيّّك
جا منير وقف وسط الكباش و حب يوقفهم
مورو: ابعد نيّك، باش يغفسوك الكباش….منيـــــــــر ابعد
بعدّ منير من وسطهم و هو مسكّر وذنيه باش ما يسمعش الكتّة
مورو: عجاج أرجع…….شبيك منير نفدلك معاك، حبّيت نتستي عجاج على الدريصاج
منير: و الله كان عملو الكتّة هاذي، كبشي ما يتفرّك من بعضو
مورو: لا يتفرّك لا شئ، كبشك راهو كاسح
منير: ما تنساش متاعك أكبر منّو و شوف قرونو قدّاش من دورة عاملين
مورو: ياخي العرك في بالك غلظ زبوب أو كبر ترم؟؟ راهو العرك تكتيك متاع مخ و خباثة، كيفو كيف النيك

نحن نحكيو ياخي طلبني مهدي
مهدي: وينك يا زبّي؟ نبقى نلوّج عليك؟ مشيتلك للدار خرجتلي أمك قالت لي خرج هو و عجاج
مورو: علاش، آش فمّا؟
مهدي: هاو معايا صاحبي باسديك بالكميونة متاعو
مورو: آه عيشو صحوبة، تفاهمت معاه على خلاص الكريا؟
مهدي: أمورو واضحة، قالك صبلي المازوط في المشية و بقية الفلوس أعطيهمنو بعد الغالا
مورو: يعطيك الصحّة يا مهدي، برّ استنّوني بحذا دار بوحميد و هاني جاييكم
مهدي: باهي، طو نستنّوك غادي

مورو: هيّا منير نروحو، الجموع يستنّو فيّا باش نمشي طوّا لبنزرت
منير: مازال بكري مورو راهي طوّا نصف النهار
مورو: آش باش نعملو، واجد يمشي بكري و يستغل الوقت باش نزيد ندرّب عجاج غادي
منير: باهي، و نشالله مربوحة مورو، طو الليلة نعملو احتفال
مورو: نشالله

وصلنا لدار بوحميد نلقا مهدي قاعد على الكبّوت متاع الكميونة و بوحميد يحكي مع صاحبتو قدّام التاكسيفون متاع الحومة و بازديك صاحب مهدي قاعد وراء القيدون متاع الكميونة

مورو: منير سامحني بربّي
منير: صلّي على النبي يا ولدي، و نشالله زينة، تشاو
مورو: عيشو، سلّم لي على عم التركي يربّي
منير: يبلغ

مهدي: شنوّا نكتلو أمو كبش التركي؟
مورو: يا ولدي منير ولّا يرعش في الكتّة الأخرانيّة، باش يبول في سروالو هههه
مهدي: و الله يعطيه الصحّة خير من ولد لوصيف، عطاك الكلمة و مبعّد جبدها
مورو: نيك أمها يا ولدي، طو يجي نهار و يستحق

مشيت سلّمت على بازديك صاحب مهدي
مورو: أهلا بيك خويا، لاباس عليك؟
بازديك: لاباس الحمدوالله
مورو: سامحنا عطلناك اليوم، راو عندك خدمة
بازديك: لا خدمة لاشئ، و علاش شبيني طوّا مانيش نخدم
مورو: من ناحية الخدمة قاعد تخدم، لكن من ناحية العط ماكش باش تصوّر برشا معايا
تطرشق مهدي بالضحك
بازديك: الّي يجي منّك مبروك و هاو مهدي زادا فرح بيّا
مهدي: ايجا مورو شوف
مورو: نشالله خير

دخلت للكميونة نلقاها مرصفة بالبيرة بواط تحت الكراسي
مورو: شنوّا هذا الكل؟ ياخي ماشين لعرس؟
مهدي: يا ولدي أكثر من عرس،.. نمشيو شايخين و نرجعو زادا شايخين، نيكولهم أمهم في بنزرت و نرجعو
مورو: ياخي ربّك ماشين نحاربو و باش نجيبو الاستقلال؟؟ مهدي اسمعني ما تشربوش برشا، ماك تعرف الكيّاس و الشراب ما يساعدش في السواقة
مهدي: أووه يا زبّي.. جاي مع بازديك في السواقة، يسوق و عينيه مغمضا، ما تخافش عليه
مورو: ربّي يستر واكاهو… هاي نطلّعو عجاج للكميونة

طلّعنا عجاج للكميونة و ربطناه
مورو: مهدي بربّي كيف توصلو للرسطورون متاع حبيبة آقف غادي، باش نشري كسكروت، مازلت ما فطرتش
مهدي: باهي
مورو: بوحميد هيّا، الراجل يستنّا فينا و معطلينو
بوحميد: لحظة بركا يا مورو
مورو: سميّة حضّر روحك باش تمشي للحمام مع نرجس نهار الخميس الجاي
سميّة صاحبة بوحميد: نشالله يا مورو، كان خلّاتني أمّي
مورو: حتّى من أمك يلزمها تمشي معاها، الحاصل طو تجيكم خالتك ماريّة تحكي معاكم
سميّة: باهي، مورو و نشالله مربوحة اليوم
مورو: عيّش أختي

طلعت أنا و بوحميد من التالي مع عجاج ومدّيت لمهدي عشرة ألاف باش يمدها لباسديك و عطيتو حق كسكروت و حق باكو الدخّان باش يهبط هو فيسع يشراهم، دخل مهدي للكميونة مدلنا صاك فيها 3 حيار ( 12 كعبة ) بيرة و قال لنا: نيكو أعملو نمّوسه و ما تسكروش
وصلنا للمطعم متاع حبيبة، هبط مهدي شرالي كسكروت تن بزايد فريت و تعدّا للحمّاص شرالي باكو دخّان، و كمّلنا المشيا متاعنا لبنزرت

أنا قاعد نفطر و نشوف في مهدي قاعد يلوّح في بواط البيرة في جرّة بعضو من الشبّاك، و المزود خدّام و هو يتهز و يتنفض بالشطيح و بوحميد متربّع كــ الحنش يشرب في البيرة و يكحّل على النساء في الكيّاس

بوحميد: مورو نجّم نسئلك سؤال؟
مورو: اسئل بوحميد من غير ما تشاور، راك خويا
بوحميد: ربّي يستر،… علاش باش تبطّل القرايا؟؟، صحيح أنا ما لقيتش خدمة، لكن كل واحد و زهرو، خايف أنت تزهّر معاك
مورو: مش حكاية زهر يا بوحميد، فمّا ظروف تحكم فيّا، و الفراية بالنسبة ليّا أنا مش وقتها طوّا
بوحميد: شنوّا على خاطر مشكلة داركم؟
مورو: دارنا هاذيكا مشكلة من المشاكل

كمّلت الكسكروت و طرشقت كعبة بيرة و كــ العادة شعلّت سيقارو
مورو: اسمعني بوحميد تعرفني ما نخبّي عليك حتّى شئ، تمرمدت برشا في القراية، نمشي نقرا كونشي عليّا ما نقراش، مخّي ديما شارد لبلاد بعيدة، الفاك الّي قريت فيها كلها تفييس و متاع كرز، المنيك فيهم راكبلي غولف 4، أنا صاحبك جوّي مش كــ جوهم، و نهار كامل يحكيو على السهريات و البواتات و الخرجات، و هاو راس العام باش يعدّيه في اسبانيا و ايطاليا..و في الحمامات، و الجموع هاذوما وصلو جابو البروفات لديارهم و فرحو بيهم، و بالطبيعة البروفات فرحو بيهم بالمعدلات و النوتات… و أنا خوك تلقاني متقطع في المطعم الجامعي و ناكل في الكاربوناطو و نجبد في سيقارو الليجار بالسرقة و نمشي نتكيفو بعيد باش ما يشلقوش بيّا الجموع الّي تتكيّف في اللايت و الميريت
بابا ما عمرو ما عطاني مصروفي و الا قال برّا ولدي ماك تقرا بعيد، شد باش تشري فطورك و أنا نهار كامل مشنقل في الكار الصفراء، و ساق في الكار و ساق في الهواء البرّا و كان لبست حاجة زبّورة نوصل بيها مهنتلة للفاك و نمشي في الظلام و نروّح في الظلام، و هاذاكا الكل و مشكلة أمّي نحبها تطلّق من بابا و نخرج نكري أنا ويّاها و حدنا

بوحميد: و الله يا مورو عاذرك لكن، طو أنت قريت و مازالك عامين ، كمّلهم و نيك شهادتك و علّقها حتّى في الحيط
مورو: طو نحكي لك هكّا و أنت تقولّي كمّلهم؟؟!!! باش نكمّلهم؟ تشوف فيّا عايش متزبّر؟ ماني انسان منيّك و من عايلة منيكة، الفاك راهي كان للكرز و الّي عندهم العط، تــ أنا ربّك نجحت في الباك بمعدل باهي و كنت انّجم نقرا طب أو حاجة أخرى زبّورة ، لكن الظروف المنيكة حرمتني و الواقع صدمني، لا عطوني بورس و لا بابا وافقلي باش ناخو قرض جامعي
بوحميد: آش باش نقول لك
مورو: ما عندك ما تقول، خوك راهو باش ينيك الحالة كيما الجموع الكل، و القراية في تونس فقط باش تخدم و يجمدولك مخّك و تلقى روحك تخدم في حاجة لا علاقة بالقريتو و ما يخلّوكش تطّور في الدومان متاعك… التونسي يقرا فقط باش يحصّل الرترات متاعو، لكن حياتو و صغرو يعدّيهم مرهون يخلّص في القروضات متاع الكرهبة و الدار…برّا عيّش خويا مدلي كعبة بيرة خير، خلّيني نسكر باش ننسى شويّا

مدلي بوحميد كعبة بيرة، حلّيتها شربتها فرد نفس، و طيّشت الشقف في الكيّاس، جا فوق كرهبة، ياخي خرّج مولى الكرهبة يدّو من الشباك يعرعر
تلفتلو وقلت له: روح نيّك. و زاد بوحميد قام باش يعرّي عليه زبّو و قال له: عرعر و طو تشدني منّو، ياخي مولى الكرهبة فهمها منيكة عليه و دوبل علينا و خلّانا

وصلنا لبنزرت و دخلنا للقهوة متاع وسط لبلاد متاعهم باش نسئلو على السمسار متاع البارتيات متاع الكباش، ياخي نلقوه لابس الدنقري و قاعد يشرب في كابوسا و يتكيّف في الكريسطال

مورو: السلام عليكم
السمسار: و عليكم السلام،….. آش أحوال خالك الدهما؟ ماهوش هابط السنة؟
مورو: كان سهّل ربّي
السمسار: برّا عيّش ولدي امشي للستاد طو نخلط عليك
مورو: معلّم، ياخي ما تحبنيش نشرب معاك قهوة؟
سمسار: مش هذا، اسمعني بابا العزيز، هنا راو فمّا برشا زنوس منيكة و نحبّك ما تحكي مع حد منهم قبل البارتي، برّا اربح الوقت و أعمل لكبشك مشيات، خلّيه يحضر روحو، آش مازال؟ سويعة و تبدأ الغالا
مورو: اسمعني، باش نقول لك حاجة، اذا ربح كبشي أنت من غير ما تعطي حتّى سوم، خلّاهم يتزايدو عليه وحدهم
سمسار: الله يبارك، غير يربح بركا

خرجت من القهوة، كلمني بوحميد من فوق الكميونة: شنوّا مورو آش عملت؟
مورو: هاني قابلتو سا يي، سويعة أخرى و تبدأ الغالا، هيّا نمشو للستاد،… خلّوني بربّي نشري باكو كريسطال
بوحميد: مورو ياخي دورتها تتكيف في الكريسطال؟
مورو: لا يا ولدي، مش ليّا أنا
بوحميد: مالا لشكون
مورو: أصبر طو نقول لك

مشيت شريت باكو كريسطال و مشينا للستاد، زدت درّبت عجاج، و بدا الستاد يتعبّى بالمغرّمة و الجموع الّي تربّي في الكباش، تناطحو 4 كباش قيل عجاج، و جات البارتي متاعو، جبدت باكو الكريسطال فرتت الحشيشة متاعو و شممتها لعجاج و نحّيتلو المدور، ياخي عجاج زاد هبل و هاج و خلّيتو يلبلب على كبش البنزرتي
مورو: ابعدو براس أمكم خلّو لهم الاسباص
بعدو جموع و وسعولهم البلاصة
مورو: اسمعني يا بنزرتي، راني نوعدك كان بكتّة وحدة و كبشك يطيح كاوو
البنزرتي: تنيّك وحدك أنت
مورو: عجاج وخّر نيّك، وخخخخخخر……..نيكلووو والديه طو!! أحرج عجاج، أخرررج
عجاج وخّر وحّر و خرج كـــ الكرطوشة يجري، يعمل هكّا يدخل في كبش البنزرتي بالراس متاعو ياخي طيرلو قرنو و فصعلو كرايمو…طاح كبش البنزرتي يتصكك، ياخي خلط عليه مولاه بالسكينة و نزلّ عليه ذبحو

بوحميد: ووووووووووووووووه وهوووووووو..دين ربّو عجاج ملّا وحش ووووووه
مشيت لعجاج ركبتلو المدور في كرايمو و شدّيتو و تلمّت بيّا العباد.
مهدي و في يدّو عصا: ابعدو دين ربكم، فضّو الحضبة على زبّي، ابعدو على الكبش
مورو و هو طاير بالفرحة: مهدي أسكت، اسمعوني يا جماعة الّي حاجتو بحاجة يجيني للقهوة طو نتفاهم معاه، ما عندي حتّى كلام هوني
مشيت عطيت للبنزرتي مولى الكبش عشرين ألف و قلت له: أعطيني بيهم زوز كيلو لحم باش ما نخسركّش في كبشك،و خلّطهم عليّا للقهوة

طلّعت عجاج للكميونة و مشيت للقهوة و الراديو كاسات مشرقع بالمزود، و نحن فرحانين كونشي علينا حرّرنا فلسطين
وصلت للقهوة، هبّطت شيشة تفّاح و كاس تاي بالمونت و عجاج راكش بحذايا، ساق على ساق و خوكم متزبّر كـــ الباشوات
جوني القشّارة و المغرمة متاع الكباش يجسّو لي في النبض
منهم واحد قال لي: هاي تسيبو بــ 3 دورو؟
مورو: لا ياولدي، خلّي تجي العباد قبل و مبعّد طو نشوفو السوم

تعبّت القهوة بالرجال و بالمفرخة الصغار و بدات العباد تسوم فيّا
مورو: زوز ملاين كبداية و الّي يحب يزيد يزيد
تلفّت راجا شايب قال لي: زوز و ميتين
واحد آخر: زوز و أربع ميا
واحد آخر: زوز و ثماني ميا و ما عادش نزيد علاهم
واحد من غادي قال: 3 كيلو ، ياخي الجموع الكل سكتت و جاني باش يعطيني لفلوس، ياخي البنرتي الّي كبشو تغلب خلط للقهوة
البنزرتي: داهما ما تبيعش وقّف البيعة، و هام 3 ملاين و نص كارطة تحك كارطة و نزيدك عليهم فخذ لحم…. و طيّش الفخذ فوق كبّوت الكميونة
هاجت القهوة بالحس و تكرّز الّي كان باش يشري و قال: شنوّا عاد فك على زبوبنا خلّينا ناكلو معاك خبزة، آش مدخّل ربّك أنت؟؟؟
البنزرتي: البيع و الشراء حلال، كان عندك في سراك اشري

تكرّز لاخر و هز روحو و مشى من القهوة
قبضت من عند البنزرتي الفلوس و مشيت لعجاج طحت على ركايبي و حمّلتو و بديت نبوس فيه و أنا نبكي و هو مسكين ماهوش شالق بشئ و مشيت للكميونة و ضربت الجنابي متاعها بونيا
مورو: نعن دين رب الفقر و نعن دين رب أمّو
جاني بوحميد و مهدي حملوني: مورو باش تفارقو طوّا و الا مبعد..ياخي هوّ الى متى باش يبقى عندك؟
مورو: راني ربّيتو من الّي هو صغير، هاذاكا شراهولي خالي الداهما قبل ما يحرق، شراهولي صغير بالكل نرضّع فيه بالبيبرو، و كبر معايا و كان يواسي فيّا في محايني و دمّاري
مهدي: هيّا مورو نروحو
مشيت للبنزرتي نوصّي فيه: اسمعني رد بالك عليه و كان تستحق حاجة كلّمني
البنزرتي: من غير ما توصّي، براس أمك سلّم لي على خالك و قول له فاتيقا ولد خالتك خيرة يسلّم عليك، و نشالله ربّي يجيبهولكم على خير
مورو: عيشك يا فاتيقا، و طو نوصّلو سلامك
البنزرتي: هيّا نشالله ربّي يجيبلكم الصواب ويجا طل على عجاج في كل وقت
مورو: السلام و نبقّيكم على خير

في الرجعة طلع معانا مهدي من التالي، و هو شادد كعبة البيرة و يشطح و مربّخها، على مرتين باش يتقلب من الكميونة
بوحميد: هيّا مورو، هاو ربح عجاج و الّي حبّيت عليه الكل وقع، و بعتو بسوم زبّور ياسر، ما كونتش تتصورو
مورو: طوّا نيك أمها الّي صار صار….. و حلّيت كعبة بيرة قرطعتها
مهدي: شنوّا حكاية الكريسطال؟
مورو: أنا قبل كنت نشمّم فيه في الكريسطال و مبعّد انّيكو بطراحة، و هو وقتها يتكرّز و يهيج
مهدي: ههههه مالّا قحبون

وصلنا للدار و وقفّنا الكميون قدّامها و المزود محلول على قوّة قوتو، خرجت أمي
أمي: شنوّا آش فمّأ
بوحميد: يا خالتي ماريّة عجاج ربح بالضربة القاضية
من غير ما تشعر أمي زغردت و جات حملتني
امي: نشالله مبروك
مورو: كيف بعتو غاضني برشا
أمي: بقدّاش بعتو؟
مورو: بثلاثة و نص

زادت أمي زغردت و عاودت حملتني و هي مسكينة باش تموت بالفرحة، مشيت جبدت الفخذ متاع اللحم
مورو: اشويه الكل خلّي الرجال تأكل منّو، … مهدي هاو خمسن ألف برّا جيبلنا زوز كرادن بيرة،… الجلاصي أخلق ربّو..تصرّف

مشى مهدي و بوحميد يجيبو في البيرة و دخلت للدار نلقى سلوى و نرجس يطيبو في العشاء، جوني باركولي، و مشيت للقاراج نظّفتو و حطّيت فيه طاولة كبيرة و ستّة كراسي و أمي قاعدة تعمللنا في برباكيو
طلبت مهدي قلت له: تعدّا لحانوت العمدة جيبلنا من عندو شويّا قلاسون
حلّيت الميني شان و حطّيت سي دي متاع لطفي جرمانة و قوّيت في الصوت
رجعو الأولاد، دخلو بالبيرة و نصبوها فوق الطاولة، خلّيتهم و مشيت للتاكسيفون شريت كارطة متاع تونزيانا و طلبت خالي الداهما

مورو: أهلا بالغالي
الداهما: أهلا بالخال، شنوّا لاباس عليكم، آش أحوال أمّك و نانو؟
مورو: الكل لاباس، و بسلمو عليك
الداهما: شنوّا الحس الّي نسمع فيه؟؟ هاك مربّحها
مورو: خالي،…عجاج ربح اليوم قدّام كبش فاتيقا البنزرتي…و بعتو
الداهما: نشالله مبروك يا سيدي
مورو: راهو غاضني كــ بعتو، و على مرتين باش نبطّل البيعة
الداهما: شنوّا مورو، طوّا هذا كلام تحكي فيه!!، في بالي خلّيت راجل و قلبو قاسي، عجاج أثّر فيك؟؟
مورو: عجاج راهو عشيري
الداهما: ما عادش نحب نسمع الكلام هذا، بيعو و اشري غيرو، فهمتني يا الخال؟
مورو: باهي، هاو معايا بوحميد و مهدي باش نعطوها بلعة كــ العادة ههه
الداهما: ههههه ديما مكوّنينها، ….هيّا نحلّيك طوّا ،عندي وين ماشي و طو مبعد في الليل نطلبكم على الفيكس
مورو: استنّى نقول لك، فاتيقا و صحابك الكل يسلمو عليك
الداهما: يسلمك و يسلّمهم
مورو: كلهم بسئلو وقتاش باش تهبط
الداهما: نشالله ربّي يسهّل
مورو: ما تعرفشي وقتاش سي ربّي باش يسهّل ؟
الداهما: يزّينا من الأسئلة الفارغة، هيّا تشاو
مورو: خالي راني نحبّك برشا،… تشاو

حضر المشوي و بردت البيرة و نكناها بلعة ما تتعاودش، شطحنا على المزود و عملنا برشا تصاور و عملنا عرس قبل عرس نرجس و زاد خلط علينا منير ولد التركي، ناكلنا موّال متاع أم كلثوم ينيك المخ، شيّخ بيه الجموع المثمولة

الجزء الخامس

les commentaires

comments

Les plus populaires

Nous contacter : enbref.tn1@gmail.com

Copyright © 2015-2019