Economie

بالفلاّقي : شنوّة يقول تقرير محكمة الحسابات حول تمويل الأحزاب ؟

كنت باش نبدا بالحديث على تمويل الحملة الانتخابيّة البلديّة، لكن البارح لمّا كثر الحديث على تمويلات الأحزاب، خيّرت نفصللكم الموضوع هذا قبل… ياللّه، ننطلقو.. الأحزاب المذكورة برشا و اغلبية الأحزاب الصغيرة لا تحترم شيئا من حيث الاجال و الإجراءات و مسك الحسابات (فضايح اصل تالمون هالحوانيت الحزبية فوضى)، لذا اقتصرنا الحديث على الأحزاب البرلمانية


إيداع التقارير المالية السنوية في محكمة الحسابات: الفصل 27 من منشور الأحزاب يفرض على كلّ الأحزاب تقديم تقرير مالي سنوي لدائرة المحاسبات

في ما يتعلّق بالفترة 2014-2017، هذي وضعيّة الأحزاب الممثّلة في البرلمان

التيّار الدّيمقراطي: أودع كلّ التّقارير السنويّة

آفاق تونس: أودع كلّ التّقارير السنويّة ما عدى 2017

حركة الشّعب: أودع كلّ التّقارير السنويّة ما عدى 2014

مشروع تونس: اودع تقرير 2016 فقط

حركة نداء تونس: أودع كلّ التّقارير السنويّة ما عدى 2017

المبادرة: أودع كلّ التّقارير السنويّة ما عدى 2014

النهضة: أودع كلّ التّقارير السنويّة ما عدى 2017

حراك تونس الإرادة : لم يودع أي تقرير منذ تأسيسه سنة 2015

ملاحظة هوني، فمّا بعض الأحزاب قدمت تقاريرها بتأخير كبير، كيما حركة النهضة الي قدمت تقارير سنوات 2011 -2012 – 2013 – 2014 في جانفي 2017 وتقارير 2015 و2016 في 2018، وحزب نداء تونس الي قدم تقارير سنوات 2013 – 2014 في جانفي 2016 وتقارير 2015 و2016 في 2018

التبرّعات

حزب حركة النهضة قدّم قائمة كلّ من تبرّع له بأموال منذ تأسيسه، على 135 ألف و569 عمليّة تبرّع، المحكمة تلقى انّو فما 68 تبرّع صادر عن ارقام بطاقات تعريف ناس ميتين في تاريخ التبرّع، و قيمة تبرّعات الموتى هذي تبلغ حوالي 20 الف دينار. صراحة المبلغ تافه، و عدد بطاقات التعريف متاع ناس موتى ما يفوتش 0،5% من مجموع عدد التبرّعات، يعني نسبة خطأ عاديّة جدّا و معقولة، و لو جات بسوء نيّة ما تصيرش بمبلغ 20 الف دينار فقط… هذا رايي على كلّ حال في النّقطة هذي بالذّات

الخطر حسب رايي (خطر عدم معرفة تمويل الأحزاب) هو في النقطة الموالية في التّقرير : محكمة الحسابات، شدّت هاك القائمة الي فيها 135569 عمليّة تبرّع، و مشات ثبتت في تواصيل التبرّع متاع عينة صغيرة ما تفوتس 2404 تبرّع منهم، تلقى انّو في 329 عمليّة ما فمّاش امضاء المتبرّع، و 7 متبرعين بطاقات تعريفهم غالطة، و 10 متبرعين فيهم ارقام بطاقات تعريف موش موجودة أصلا في سجل الحالة المدنية الوطني

مشروعيّة موارد الأحزاب

حركة الشعب و آفاق تونس ما عندهمش سجلّ انخراطات و لا قائمة منخرطين، و هي مخالفة صريحة للفصل 24 من مرسوم 2011 المتعلق بالاحزاب
قانون الأحزاب يمنع الحصول على تبرّعات من أشخاص معنويّين (يعني شركات او جمعيّات او أحزاب او منظمات)، حزب آفاق تونس تحصّل على تبرّعات من اشخاص معنويّين بقيمة 7 الاف و 250 دينار
أقصى مبلغ تبرّع ينجّم يقدمو شخص واحد لحزب في سنة معيّنة هو 60 الف دينار، عام 2017 فما شخص تبرع لحزب آفاق تونس بـ 75 الف دينار


قانون الأحزاب يمنع تلقّي تبرّعات نقدا تفوق 500 دينار (يعني الي يحب يعطي اكثر يمشي يصب في حساب الحزب)، و القانون يفرض خاصّة التعريف الكامل لهويّة المتبرّع و رقم بطاقة تعريفو… بين 25 جانفي 2018 و 4 ماي 2018، محكمة الحسابات تلقى انّو حزب النهضة تلقّى تبرّعات نقدية بقيمة مليارين و 290 مليون ملّيم، الإشكاليّة انّو التبرّعات هذي صارت بمبالغ تفوت 5 الاف دينار لكل عمليّة و وصلت 50 الف دينار مرّة واحدة لـ45 عمليّة (الحد الأقصى القانوني للتّبرّع نقدا هو 500 دينار)، المصيبة موش هذي حسب رأيي، الخطر، يتمثّل في كونو مليار و 790 مليون ملّيم ما فمّا حتّى معلومة على هويّة الي تبرعو بيهم، لا أسماءهم و لا رقم بطاقات تعريف


تذكير، تحدّثنا فقط عن الأحزاب البرلمانيّة الّي ذكرتهم المحكمة في تقريرها، و اليوم تحدّثنا فقط عن تمويل الأحزاب، ان شاء الله المقال الجاي نحكيو على الجزء الثّاني المتعلّق بالحملة الانتخابيّة متاع البلديّة

الاقتصاد بالفلّاقي



les commentaires

comments

Les plus populaires

En Bref est un magazine qui facilite l'accès à l'information. Monde, national, hi-tech, économie, sports, buzz : En Bref est l'outil adéquat pour que rien ne vous échappe de l'actualité.

En Bref vous fait gagner du temps en passant au crible toutes les news crédibles pour en garder les plus pertinentes. En Bref est décliné en versions web et mobile (Android).

En Bref, l'info autrement.

Nous contacter : enbref.tn1@gmail.com

Copyright © 2015-2017 EnBref. Powered by ThrustWork.