Economie

بالفلاّقي : زعمة بالرسمي البنوك الاسلامية ما ترفعش في سعر الفائدة لما الـت.م.م يطلع ؟

سليم بسباس صرّح انّو الي ماخذين قروض من بنوك اسلاميّة ما يصيرلهمش تغيير في قيمة القصاصات الشهريّة لمّا يتغيّر الـت.م.م هذا كلام صحيح، لكنّو صحيح في الزّوز اتجاهات، لمّا يطلع الـت.م.م، القصاصات ما تتغيّرش، و هذي وضعيّة في صالح حريف الماليّة الإسلاميّة على عكس الماليّة العاديّة…لكن لمّا ينقص الـت.م.م، كيف كيف، ما يتغيّر شي بالنّسبة لحريف الماليّة الإسلاميّة على عكس حرفاء البنوك العاديّة، الي قصاصاتهم تنقص بنزول الـت.م.م، حرفاء البنوك الإسلاميّة يقعدو يخلصو في نفس المبلغ مهما ينزل الـت.م.م. هذي واحد

اثنين، البنوك الاسلاميّة ماهيّاش جمعيّات خيريّة، و هدفها أيضا الرّبح، و الرّبح هذا جاي من الفرق بين الارباح ال تعطيهم للنّاس الي يحطّو عندها فلوسهم، و الأرباح الي تقبضهم هي من الحرفاء الي تموّل فيهم

كيفاش تحسب هالارباح ؟

البنوك الاسلاميّة تعمل في محيط اقتصادي و اجتماعي، و مادام منافسيها البنوك العاديّة يغيّرو نسب الانتيريس على الودائع و القروض متاع حرفاءهم حسب تغيّرالـت.م.م، البنوك الاسلاميّة، اذا تحبّ تقعد تنافسيّة و تجذب حرفاء، لازمها ما تبعدش برشا على تسعيرات البنوك العاديّة، و بالتّالي تصبح بدورها خاضعة لتغيّر الـت.م.م، و تسعيرة البنوك الإسلاميّة ما تتمسّش بالنسبة للعقود القديمة، لكنها تتغيّر طبعا بالنّسبة للعمليّات الجديدة، حسب ما يتغيّر الـت.م.م

والي يمشي اليوم للبنوك الإسلاميّة باش ياخو قرض، لازمو يعرف، انهم باش يحسبولو سعر بإعتبار الـت.م.م الجديد، و يعرف خاصّة انّهم باش ياخذو في إعتبارهم امكانيّة تواصل ارتفاع الـت.م.م في الفترة القادمة، و بالتّالي، باش يحسبولو السّوم الي يغطّيهم حتّى لو ارتفع الـت.م.م مستقبلا، لكن بالطّريقة هذي، و خلافا لحرفاء البنوك العاديّة، فإنّو الانخفاض المستقبلي للت.م.م ما يغيّر شي من قيمة القصاصات على حرفاء البنوك الإسلاميّة

يقول القائل، فين شفتو هابط الـت.م.م ؟ هاو ديما طالع

صحيح، قاعد طالع توا عندو عامين محسوب، و ممكن يتواصل الارتفاع في الفترة القليلة القادمة، لكنّ ردّو بالكم، راهو بالفعل الـت.م.م يطلع و يهبط حسب وضعيّة السّوق، يعني الي ناوي على قرض سكن و الا قرض سيّارة، يعني مدّة بين 7 و 25 سنة، التورّط في نسبة انتيريس قارّة مع بنك عادي (قرض على اكثر من 15 سنة) و الا مع بنك إسلامي (مهما كانت مدّة و نوع القرض)، ممكن بعد عامين و الّا ثلاثة يصبح يدفع في انتيريس غالي برشا و لا علاقة بالانتيريس في السّوق وقتها

صحيح الانتيريس توّا طالع، و السبب الأساسي في طلوع هو نسبة التضخّم متاع الأسعار في تونس الي وصلت مستويات قياسيّة، لكن البنك المركزي قاعد ياخذو في إجراأت مصيرها تعطي أكلها، و يكفي انو الحكومات الجاية تسيطر على مسالك التوزيع و تعمل إجراأت عفو لتشجيع الأموال الي في السوق الموازية او تسرّع في إجراأت الدّفع الالكتروني، باش التضخّم يتراجع، و وقتها آليّا البنك المركزي باش يخفّض في سعر الفائدة التّوجيهيّة و آليّا ينخفض الـت.م.م بعدها. و انا نتوقع اما انخفاض للضغوط التضخمية في السنتين القادمتين، او الانهيار التام للبلاد بعدها لا قدر الله

الخلاصة

صحيح البنوك الاسلامية ما تبدلش قصاصاتها بالنسبة للقروض القديمة، لكن بالنسبة للي ديجا ماخذين، خوذو حذركم من اسعار الكوميسيون، خاطر ممكن يخطرلهم يرفعو فيهم، لتغطية خسائر ارتفاع الـت.م.م. بالنسبة للي باش ياخذ جديد راهو في جميع الحالات اذا من بنوك عادية باش ياخوه بانتيريس طالع (بإعتبار الـت.م.م اليوم) و اذا من بنوك اسلامية، راهي و باش تحسبلو انتيريس قار (او هامش) قوي يغطي توقعات المنحى التصاعدي للت.م.م

وهوني الفرق الوحيد هو انو حريف البنوك الاسلامية يستفاد اذا الـت.م.م يزيد، و يتضر اذا يهبط في المستقبل، و حريف البنوك العادية يتضر اذا التمم يطلع، و يستفاد اذا يهبط… و اليوم بالنظر الى وضع نسب الفائدة العالية، و بالنسبة للناس الي باش تاخو كريديات على فترة طويلة، تذكروا انو اذا الـت.م.م يطيح، انتوما ما تستفادوش من طياحو نهار اخر

الاقتصاد بالفلّاقي

les commentaires

comments

Les plus populaires

En Bref est un magazine qui facilite l'accès à l'information. Monde, national, hi-tech, économie, sports, buzz : En Bref est l'outil adéquat pour que rien ne vous échappe de l'actualité.

En Bref vous fait gagner du temps en passant au crible toutes les news crédibles pour en garder les plus pertinentes. En Bref est décliné en versions web et mobile (Android).

En Bref, l'info autrement.

Nous contacter : enbref.tn1@gmail.com

Copyright © 2015-2017 EnBref. Powered by ThrustWork.