Economie

؟ TMMبالفلاّقي : شنوّا الـ

المواطن، لمّا يمشي لأي بنك باش يأخذ قرض، اوّل حاجة يسأل عليها، هي قدّاش ينجّم يأخذ، و البنكاجي، يجاوبو بعد ما يسألو على شهريتو، او مداخيلو الشّهريّة اذا ماهوش شهّار… لكن، إضافة لمبلغ القرض و مدّة الترجيع، فمّا بالطبيعة معلومة أخرى مهمّة للمواطن و للبانكا، هي نسبة الانتيريس الي باش يخلّصها المواطن على هاك القرض الي خذاه… و في غالبية الحالات (يعني اذا القرض ما تفوتش مدة تسديدو 15 سنة)، البنوك، ما تقولش للمواطن انّو الانتريس الي باش يدفعو هو كذا

لا، نسبة الانتيريس الي يتفقوا عليها المواطن و البانكا، هي في اغلب الحالات ت.أم.أم + عدد من النقاط، مثلا ت.أم.أم + 3 و الاّ 4 و الاّ غيرو

آش معناها الحكاية هذي؟ و علاش يعملو فيها أصلا؟


البنوك، عندها ضوابط لتوازناتها الكبرى في السيولة، معناها لازم في أي نهار يكون عندها كمّية فلوس ليكيد، مرتبطة بقدّاش عندها ودائع و قدّاش عاطية كريديات، و الكمّية هذي يحدّدها البنك المركزي حسب ضوابط تقنية معينة… المفيد، و في إطار نشاطها اليومي، فمّا بنوك تنجّم تتجاوز هاك الكمّية المطلوبة، و بنوك تكون وضعيّة فلوسها اقلّ من الكمّية المطلوبة، و لتلافي النّقص، البنوك تتسلّف من بعضها على نهار، و البانكا الي عندها فايض سيولة، تسلّف البانكا الي ناقصة سيولة،، و بالطبيعة، لمّا يتسلفو من بعضهم، يتسلّفو بالانتيريس

نجيو أخيرا ل ت.أم.أم شنوّا… هاك نسبة الانتيريس الي البنوك يسلفو بيه لبعضهم على نهار، يجي البنك المركزي، و يحسب المعدّل متاعها على شهر كامل، و ينشر على موقعوا قيمة المعدّل متاع الشهر هذاكا، و هذاكا هو ت.أم.أم

و الـت.أم.أم الي يطبقوا فيه البنوك في شهر جانفي الحالي مثلا، هو معدّل الانتيريس الي طبقوه البنوك بين بعضهم في تعاملاتهم متاع شهر ديسمبر… و قيمتو حاليّا %7،24

يعني بالنهاية، لمّا بانكا تقول لمواطن، و الا شركة، راني باش نعطيكم قرض بانتيريس ت.أم.أم +3 مثلا، فالنسبة متاع الانتيريس تطلع 10،24% في الشهر الحالي… و بالطبيعة، لو يتغيّر الت.أم.أم الشهر الجاي و يولّي 7،30%، فإنّو الانتيريس الي يدفعو المواطن او الشّركة، في افريل، باش يولّي %10،30

يقول القايل، علاش هالبوبلي الكلّ، علاش بكلّ بساطة، البانكا ما تقولش للمواطن راني باش نسلفك بنسبة انتيريس بكذا% و قصّ النزاع

لازمنا نتذكّروا اوّلا انّو البانكا، هي شركة مثل باقي الشّركات، الهدف متاعها هو انها تربح فلوس باش تواصل تعيش و ما تفلسش

ثانيا، البانكا عندها كلفة لهاك الفلوس الي تسلّف فيهم، و كلفة البانكا، مرتبطة هي بيدها بالت.أم.أم، ما قلتش كلفة البانكة هي الت.أم.أم، قلت مرتبطة بالت.أم.أم… توّا نتصورو تجي البانكا للمواطنين، و تقلهم باش نسلّفكم بانتيريس 8%، و من الجهة أخرى، الـ ت.أم.أم، يعني الانتيريس الي يخلصوه البنوك لمّا يتسلفو من بعضهم، يطلع لفوق 8% معناها البانكا باش تولي تخدم بالخسارة، و هذا طبعا امر موش مقبول… هذاكا علاه، الانتيريس على القروضات، يكون ديما مربوط بقيمة الـت.أم.أم، باش البانكا ما تخدمش بالخسارة

لكن ربط الانتيريس بالت.أم.أم فيه استثناء يهم القروض الي مدة خلاصها تفوت 15 سنة، في الحالات هذي، البنك المركزي يفرض على البنوك تحديد نسبة انتريس قارة و محددة على اعتبار انو المواطن ما ينجمش يكون مسؤول و لا عندو القدرة على تقييم كيفاش باش يتطور ت.أم.أم بعد اكثر من 15 سنة

الاقتصاد بالفلّاقي


les commentaires

comments

Les plus populaires

Nous contacter : enbref.tn1@gmail.com

Copyright © 2015-2019